• Abovyan,
  • Mon - Fri
    09:00 - 18:00

Աննախադեպ միջոցառում Կուբանի հայ համայնքում

Հուլիսի 21-ին, «Ռուսաստանի Հայերի միություն» համառուսական հասարակական կազմակերպության Կրասնոդարի երկրամասի տարածաշրջանային մասնաճյուղի նախաձեռնությամբ տեղի ունեցավ քննություններում առավելագույն 100 միավոր վաստակած մեդալակիրների ու շրջանավարտների մեծարման արարողությունը։ Այս տեսակ միջոցառում Կրասնոդարի երկրամասի հայ համայնքի պատմության մեջ առաջին անգամ է անցկացվում: Արարողությանը մասնակցում էին շուրջ հարյուր շրջանավարտներ՝ Կուբանի տարբեր քաղաքներից և շրջաններից:

Կրասնոդարի երկրամասի ՌՀՄ ՀԿ–ի նախագահ Կամո Հայրապետյանը ողջույնի խոսքով դիմեց ներկաներին՝ շնորհավորելով նրանց դպրոցը հաջողությամբ ավարտելու և մասնագիտական ​​կրթության ու աճի ուղին բռնելու կապակցությամբ։ Կոչ անելով երիտասարդներին չկորցնել գիտելիքի ծարավն ու ինքնազարգացման ցանկությունը՝ Կուբանի հայ համայնքի ղեկավարն ընդգծեց, որ իրենց հաջողությունների գրավականը նաև ուսուցիչների և ծնողների հսկայական աշխատանքն է։

«Ուսման մեջ առանձնահատուկ նվաճումների համար» մեդալի արժանացած, ինչպես նաև միասնական պետական ​​քննության ընթացքում առավելագույն միավորներ հավաքած շրջանավարտներին շնորհավորեց նաև Կրասնոդարի երկրամասի ազգային մշակույթների կենտրոնի նախագահ Վասիլի Չամանովիչ Չանբան:

Հանդիսավոր միջոցառմանը բեմ հրավիրվեցին աչքի ընկած շրջանավարտները՝ իրենց ծնողների հետ միասին։ Բոլոր շրջանավարտները ստացան  Ռուսաստանի հայերի միության պատվոգիր և «ՌՀՄ 20 տարի» հուշամեդալ, իսկ ծնողներին հանձնվեց ՌՀՄ շնորհակալագիր՝ զավակին օրինակելի դաստիարակելու համար։ Երախտագիտության խոսքով ելույթ ունեցան նաև շրջանավարտները: Նրանք շնորհակալություն հայտնեցին իրենց ծնողներին և ուսուցիչներին ուսման տարիներին ցուցաբերած հոգատարության և մշտական ​​աջակցության համար։ Շնորհակալություն հայտնեցին նաև տոնական միջոցառման կազմակերպիչներին՝ Կրասնոդարի երկրամասի ՌՀՄ-ին:

Միջոցառումն ավարտվեց տոնական համերգով և ընդհանուր լուսանկարով՝ ի հիշատակ շրջանավարտների, նրանց ծնողների և Կրասնոդարի երկրամասի «Ռուսաստանի հայերի միություն» համառուսաստանյան հասարակական կազմակերպության տարածաշրջանային մասնաճյուղի ղեկավարների։