Հարցերին պատասխանում է Հարավային Ռուսաստանի Հայոց Թեմի Եկեղեցասեր Երիտասարդաց Միության խորհրդի անդամ Գայանե Բայաթյանը
— Ի՞նչն է քեզ կապում եկեղեցու հետ։
— Եկեղեցու հետ ինձ կապողն այն զգացումն է, որ ես գտնվում եմ Աստծո տանը։
— Սուրբ Գրքի ընթերցանությանը ժամանակ տրամադրու՞մ ես։
— Այո, բայց ժամանակ առ ժամանակ խախտվում է կյանքի ռիթմը, և ընթերցումը, ցավոք, մղվում է վերջին պլան։
— Ովքե՞ր են ձեր թեմի երիտասարդները։
— Մեր թեմի երիտասարդները 14-ից մինչև 35 տարեկաններն են։ Նրանք ունեն ամենատարբեր նախասիրություններ, բայց նրանց բոլորին միավորում է եկեղեցին։ Կրտսեր երիտասարդները աշակերտներ և ուսանողներ են, իսկ ավագ երիտասարդներն արդեն ամեն մեկն իր մասնագիտության մեջ կայացած մարդիկ են (իրավաբան, ռեժիսոր, ՏՏ և SMM մասնագետներ, երաժիշտներ, նկարիչներ, դիզայներներ, խոհարարներ, շինարարներ, տնտեսագետներ, մարզիկներ, սպորտի վարպետներ և այլն), որոնք փորձում են ամեն մեկն իր մասնագիտությամբ օգնել թե՜ եկեղեցուն, թե՜ համայնքին, և Երիտասարդաց միության կազմակերպվող միջոցառումներին ներդնել իրենց մասնագիտական փորձը և ամեն գործում լինել եկեղեցասեր, ազգասեր և հայրենասեր։
— Ձեր թեմում ինչպիսի՞ գործունեություն են ծավալում երիտասարդները։
— Երիտասարդները կատարում են ամենատարբեր աշխատանքներ՝ ի նպաստ հայ եկեղեցու և հայրենիքից դուրս ազգապահպանման։
— Ակտիվ երիտմիություն ունենալու համար ի՞նչ է անհրաժեշտ։
— Անհրաժեշտ է գրագետ ղեկավարում և աշխատանքի կազմակերպում։
— Սոցցանցերում ի՞նչ էջեր ունեք, և հետևու՞մ ես արդյոք Հայ Եկեղեցու Համաշխարհային Երիտասարդական Միավորման`( ՀԵՀԵՄ) կայքէջին, սոցիալական էջերին։
— ՀԵՀԵՄ-ի կայքին և էջերին հետևում եմ։ Ունենք էջեր հիմնական սոցցանցերում։
— Մասնակցել ես ՀԵՀԵՄ-ի քրիստոնեական երիտասարդական աշխատանքի կազմակերպման դասընթացին։ Ի՞նչ տվեց այն քեզ։
— ՀԵՀԵՄ-ի դասընթացներին մասնակցել եմ։ Դրանք մեզ տվեցին երիտասարդաց միության մեջ աշխատելու և մյուս երիտմիությունների հետ համագործակցելու շատ կարևոր գիտելիքներ։
— Ձեր թեմում փորձու՞մ եք իրականացնել երիտասարդական քրիստոնեական աշխատանքին ուղղված նույնատիպ ծրագրեր։
— Այո, մեր թեմում կազմակերպում ենք նմանատիպ ծրագրեր, և դրանք երիտասարդներին շատ են ոգևորում։
— Մասնակցել ես ՀԵՀԵՄ համահայկական ուխտագնացությանը, ի՞նչ տվեց այն քեզ։
— Ուխտագնացությանը մասնակցել եմ։ Բացի ֆորումային օրերից, որոնք մեզ տվեցին միասին և համակարգված աշխատելու մեծ փորձ, ինչպես նաև՝ սփյուռքի մյուս օջախներում ապրող երիտասարդների հետ ծանոթություն, Հայրենիքին և Հայ Եկեղեցուն ավելի ամուր կապվելու հնարավորություն, ինչպես նաև հայ քրիստոնյա երիտասարդի դերը աշխարհում ավելի մեծացնելու հնարավորություն։
— Ի՞նչ առաջարկներ ունես ՀԵՀԵՄ-ին։
— ՀԵՀԵՄ-ին առաջարկում եմ օնլայն հանդիպումների միջոցով երիտասարդների հետ հաճախակի աշխատանքներ տանել։