ՀԵՀԵՄ գրասենյակում մեկնարկեց «Աստծո կամքը» դասընթացը
Հայ Եկեղեցու Համաշխարհային Երիտասարդական Միավորման (ACYOWorld) գրասենյակում սույն թվականի ապրիլի 4-ից ավելի քան չորս տասնյակ երիտասարդների համար մեկնարկեց «Աստծո կամքը» 7-շաբաթյա քննարկումների շարքը։
Դասընթացը ներառում է այնպիսի թեմաներ, ինչպիսիք են․ Աստվածաշունչը և կյանքի իմաստը, Աստվածաշունչը և բիոէթիկական խնդիրները, Աստվածաշունչը և կին-տղամարդ հավասարությունը, Աստվածաշունչը և մարդկային տկարությունները և այլն։
Դասընթացի նպատակը երիտասարդներին աստվածաշնչային պրակտիկ գիտելիքների փոխանցումն է, որը կօգնի նրանց գտնել իրենց համար կենսական նշանակության հարցերի պատասխանները։
Ապրիլի 4-ին մեկնարկած դասընթացի բանախոսության առաջին թեման էր «Աստվածաշունչը և կյանքի իմաստը»։ Դասընթացը վարեց ՀԵՀԵՄ հոգևոր տեսուչ Հոգեշնորհ Թովմա վարդապետ Խաչատրյանը։ Նա անդրադարձավ կյանքի և մահվան գոյաբանական հարցին, պատերազմներին և բնական աղետներին, դժբախտ պատահարներին, և սուրբգրային օրինակներով ցույց տվեց, թե ինչպես է Աստված գործում այդ ամենում։
Այնուհետև դասընթացի մասնակիցները պատասխանեցին Հայր Սուրբի հարցերին և իրենք առաջադրեցին հարցեր։
«Աստծո կամքը» դասընթացը մեկնարկեց և ավարտվեց Տերունական աղոթքով։
ՀԵՀԵՄ-ը գործում է Ամենայն Հայոց Կաթողիկոսի տնօրինությամբ և Բարձրաշնորհ Տ․ Հովնան արքեպիսկոպոս Տերտերյանի առաջնորդությամբ։ Կառույցը համախմբում է աշխարհասփյուռ հայ եկեղեցասեր երիտասարդաց միություններին: