• Abovyan,
  • Mon - Fri
    09:00 - 18:00

Ինքդ դարձիր Ձմեռ Պապ

Տեխասի պատմության ուսուցչուհի Լեսլի Ռաշը գրել է այն մասին, թե ինչպես է իր ընտանիքը ճշմարտությունն ասում Սանտայի մասին արդեն քանի սերունդ: Եվ այդ մեթոդն այնքան գեղեցիկ է, որ նրանք դրանով կիսվում են բոլորի հետ․

-Երբ երեխան դարձել է վեց-յոթ տարեկան, և դուք նկատում եք նրա առաջին կասկածները Ձմեռ Պապի գոյության վերաբերյալ, ուրեմն նա արդեն պատրաստ է:

Ես նրանց սովորաբար տանում եմ սրճարան և իրենց ուզածը պատվիրելուց հետո, ասում եմ հետևյալը. «Դու, իհարկե, այս տարի շատ ես մեծացել։ Եվ ոչ միայն բոյ ես քաշել, տեսնում եմ, որ սիրտդ էլ է մեծացել։ Եվ դու այնքան ես մեծացել, որ ինքդ կարող ես դառնալ Ձմեռ Պապ:

Երևի նկատել ես, որ Ձմեռ պապերի մեծ մասը, որոնց տեսնում ես, նրա նման հագնված մարդիկ են: Ընկերներիցդ ոմանք կարող են նաև քեզ ասած լինել, որ Ձմեռ Պապ գոյություն չունի:

Շատ երեխաներ այդպես են մտածում, քանի որ դեռ պատրաստ չեն Ձմեռ Պապ լինելուն: Բայց դու պատրաստ ես»: (Փորձեք այդ ամենն ասել խորհրդավոր ձայնով):

Խնդրեք երեխային ընտրել որևէ մարդու, օրինակ՝ ձեր հարևանին: Երեխայի առաքելությունն է՝ գաղտնի պարզել, թե ինչի կարիք ունի այդ մարդը, այնուհետև նվերը փաթեթավորել թղթի մեջ և մատուցել: Եվ երբեք չբացահայտել, որ նա է դա արել: Ձմեռ Պապ լինելու նպատակը գովեստներ ստանալը չէ, այլ՝ նվեր անելու անկեղծ ցանկությունը:

Ավագ տղաս ընտրեց անկյունի վրա ապրող «վհուկ մորաքրոջը»։ Կինը իսկապես ահ ու սարսափ էր ազդում։ Նրա տան շուրջ պարիսպ կար, և նա երբեք թույլ չէր տալիս երեխաներին անցնել դրա վարյով՝ գնդակ կամ ֆրիսբի խաղալու: Նա հաճախ էր բղավում, որ երեխաները լուռ խաղան և նման բաներ:

Դպրոց գնալու ճանապարհին որդիս նկատեց, որ «վհուկը» ամեն առավոտ ոտաբոբիկ դուրս էր գալիս պատշգամբ՝ փոստը վերցնելու, և որոշեց, որ նրան հողաթափեր են պետք: Այնպես որ, նա ստիպված էր լրտես դառնալ և թաքնվել թփերի մեջ՝ պարզելու նրա ոտքերի մոտավոր չափը։

Երբ մենք նրա համար տաք հողաթափեր գնեցինք, տղաս փաթեթավորեց դրանք, իսկ վրան փակցրեց գրություն՝ «Շնորհավոր Սուրբ Ծնունդ Ձմեռ Պապից»:

Երեկոյան, ճաշից հետո որդիս գնաց նրա տուն և նվերը դրեց նրա դռան մոտ:

Հաջորդ առավոտ մենք թաքուն հետևեցինք, թե նա ինչպես դուրս եկավ պատշգամբ, վերցրեց իր ծանրոցը և մտավ տուն: Տղաս չէր համբերում հաջորդ օրը շարունակությունը տեսնելու։

Եվ հաջորդ առավոտ մենք տեսանք նրան տաք հողաթափերով փոստը վերցնելիս: Որդիս էյֆորիայի մեջ էր։ Ես ստիպված էի նրան հիշեցնել, որ ոչ ոք երբեք չպետք է իմանա, որ նա է դա արել, հակառակ դեպքում այլևս երբեք ինքը Ձմեռ Պապ չի կարող լինել:

Հաջորդ տարիներին նա ընտրում էր նոր մարդկանց՝ նվերներ անելու համար, և միշտ ընտրում էր յուրահատուկ, ինքնատիպ նվերներ:

Մի տարի նա մանրակրկիտ մաքրեց իր հեծանիվը, փոխեց թափքը և տվեց մեր ընկերներից մեկի աղջկան։ Այդ մարդիկ շատ աղքատ էին։ Աղջկա հորից հետաքրքրվեցինք, թե որքանով դա տեղին կլիներ։

Աղջկա դեմքի արտահայտությունը, երբ նա իր տան մոտ հեծանիվ տեսավ, կարելի էր համեմատել միայն տղայիս դեմքի ուրախության արտահայտության հետ։

Երբ պահը եկավ ամեն ինչ պատմելու կրտսեր որդուս, ավագը ցանկացավ անձամբ խոսել նրա հետ։ Հիմա նրանք երկուսն էլ գերազանց «նվիրողներ» են և երբեք չեն զգացել, որ ինչ-որ մեկին դրանով խաբում են։

Չէ՞ որ նրանց հայտնել էին Ձմեռ Պապ լինելու գաղտնիքը:

 

Լեսլի Ռաշ