ՀԵՀԵՄ հոգևոր տեսուչի ամանորյա և Սուրբծննդյան շնորհավորանքը
Սիրելի քույրեր և եղբայրներ ի Հայաստան, ի Արցախ և ի Սփյուռս աշխարհի,
Անցնող Տերունի 2022 թվականը մեզ նոր մարտահրավերների առջև կանգնեցրեց։ Սահմանին ունեցանք մեծաթիվ զոհեր և շրջափակված Արցախ աշխարհ։
Չնայած մեր ազգի առջև ծառացած բոլոր այդ և այլ դժվարություններին` շարունակեցինք մեր գործունեությունը։
Մասնավորապես, Վեհափառ Հայրապետի բարձր հովանու ներքո ՀԵՀԵՄ գրասենյակը կազմակերպեց տարածաշրջանային և թեմական ֆորումներ ու դասընթացներ աշխարհի չորս ծագերում։ Հայրենիքում տեղի ունեցավ «ՀԵՀԵՄ-ը Հայաստան-Սփյուռք կամուրջ» համահայկական ուխտագնացությունը՝ կրթական բաղադրիչի ավելացմամբ։
Այս և այլ իրագործումների համար շնորհակալ ենք Բարձրյալին և Մայր Եկեղեցուն։
Աղոթում եմ և հույս ունեմ, որ նոր 2023 Տերունական տարին իրապես կդառնա համազգային համախմբման, հոգևոր և ազգային վերազարթոնքի տարի։
Արդ,
Սուրբ Ծննդյան Ավետիսով թո՛ղ ցնծան մեր սրտերը, և մեր հոգիները խանձարուր դառնան Քրիստոս Մանկան համար։
Սիրելիներ,
Փոխանցելով նաև ՀԵՀԵՄ հոգևոր առաջնորդ Բարձրաշնորհ Տ. Հովնան արքեպիսկոպոս Տերտերյանի շնորհավորանքներն ու օրհնությունները՝ մաղթում եմ բարօրություն Հայաստան աշխարհին և մեր հայրենակիցներին:
Ազգովի մասնակցենք Սուրբծննդյան հոգեպարար արարողություններին և միասնաբար միմյանց ավետենք մեր Տիրոջ փրկական Ծնունդն ու Սուրբ Հայտնությունը։
Շնորհավո՛ր Ամանոր և Սուրբ Ծնունդ։
Սիրով և աղոթքներով,
Թովմա վարդապետ Խաչատրյան
ՀԵՀԵՄ հոգևոր տեսուչ